Itoy a bilang, maragsakankami a mangibinglay kadakayo iti umuna iti dua a paset ti a "Lam-ang" a mabigbig nga epiko dagiti Ilokano. Daytoy mabasayo ita, maysa laeng kadagiti adun a bersion ti nasao nga epiko. Am-ammo daytoy a kas "Parayno Version," nalawag a gapu iti panangipablaak itoy ti Imprenta Parayno ti Calasiao, Pangasinan. Inmaldit ti nasao nga imprenta daytoy idi 1962 ket damag a mailaklako idi ti nasao a librito kadagiti tiendaan—iti abay dagiti tagilako a buneng ken dadduma pay a kasapulan dagiti mannalon.

Daytoy a librito ket agrukod iti 10.5 sentimetro por 14 sentimetro ken agpuskol iti 56 a panid (di nairaman ti akkub a nakusnaw nga asul. Naimaldit met iti gagangay a papel (newsprint) agraman ti akkubna.

Induldulin daydi Atty. Benjamin M. Pascual, mabigbig a mannurat iti Iluko ken Ingles a tubo ti Laoag City, ti nasao a kopia a nakakopiaan daytoy naimaldit ita iti BALIKAS. Insagutna ti kopia idi agangay ken ni Juan S.P. Hidalgo Jr., padana met laeng a mabigbig a teddek ti Kurditan Iluko—ket ni met laeng Apo Hidalgo ti nangipabulod iti kopia iti BALIKAS tapno datayo a nakabasa idin iti daytoy, agungar manen iti lagiptayo ti kabibiag ni Lam-ang, ken datayo met a di pay nakabasbasa iti pakasaritaan ni Lam-ang, mananamtayo met ti agdindinamag nga epiko.

Iti sabali a bangir, ipeksa met ti GUMIL Filipinas ti panagyamanna ken ni mannurat Fred Quibol, maysa nga inhiniero sibil a tubo ti Caoayan, Ilocos Sur ngem agnaeden iti Hawaii, iti panangigastona iti pannakaimprenta daytoy a bilang ti BALIKAS (Bilang 6) ken uray pay iti sumaruno a bilang toy pagbasaan (Bilang 7). Kameng ti GUMIL Oahu ni Apo Fred ken isu pay ti agdama nga editor ti Tangguyob, opisial a pagiwarnak ti GUMIL Oahu. Idi maammuanna a problema pinansial ti gapuna no apay a maitantatantan ti pannakairuar ti BALIKAS, nagboluntarion a nangigasto iti dua a bilang ‘toy pagiwarnaktayo.

"Anusanyo ‘toy sangkabassit a maitulongko," kinunana iti pannakiuman kenkuana ti BALIKAS babaen ti telepono.

Kinuna met ti BALIKAS: "Anusam, Apo Fred, ta dakayo dita GUMIL Oahu ti pangbiitanmi a pagkararagan iti agas no kasta a sumkil ti dila ti BALIKAS."

Dakayo dita, kuna ti BALIKAS, ta no malagipyo pay, inggastuan met idi ni Apo Amado I. Yoro, presidente ti GUMIL Oahu, ti maysa a bilang ti BALIKAS.

Ket no di agriro ti panangibuksilmi iti masansan a maitagtagainep ti BALIKAS, igastuanto manen ni Apo Amado ti pannakaimaldit ti maysa pay kadagiti sumarsaruno a bilang daytoy a pagiwarnak.

Ken, sapay koma ta adu pay a kakabsat iti GUMIL ti umarayat tapno nasaranta nga agkutikuti ti dila ken dawatdawat ti BALIKAS.

Sapay koma.