Nagan ti Proyekto:

“Mutia ti GUMIL Filipinas 2001”

Kangrunaan a Panggep:

Maaddaan ti GUMIL Filipinas iti kabukbukodan a pasdek para iti opisina, pakaangayan ti komperensia, biblioteka, museo, ken pagdagusan

Nakaipuonan ti Panggep:

Tallopulo-ket-tallonton a tawen ti GUMIL Filipinas, ngem agpapan ita, makidagdagustayo pay laeng iti opisina ti BANNAWAG.

Idi Abril 29, 2000, opisial nga inyawat da Dr. Godofredo S. Reyes ken ti kaingungotna, ni Dr. Dedicacion Agatep-Reyes, ti Deed of Donation a pammaneknek iti panangidonar ni Dr. Godofredo S. Reyes iti lote para iti GUMIL Filipinas. Aglawa ti lote iti sumurok-kumurang a 200 metro kuadrado ken masarakan daytoy iti Brgy. Suso, Sta. Maria, Ilocos Sur. Iti sumuno nga aldaw, Abril 29, naikali iti nasao a lote ti kapsula a naglaon iti kopia ti Deed of Donation.

Itan ta addaantayon iti kabukbukodan a lote, masapul ngarud nga irugitayon a patakderan iti maysa a pasdek tapno adda pagidulinan kadagiti libro, sinurat, kasuratan, ken dadduma pay a pakalaglagipan ti sumarsaruno a kaputotan kadatayo, malaksid laeng iti pagyanan no maisar-ongtayo wenno adda masindadaan a pagkokomperensiaantayo.

Pannakatungpal daytoy a Panggep:

Amin a chapter ti GUMIL Filipinas (munisipio, pagadalan, probinsia ken dagiti adda iti ballasiw-taaw kas iti GUMIL Hawaii, Oahu, Hawaii Grande, Greece, California, kdp.), maaddaanda koma iti isalip para iti “Mutia ti GUMIL Filipinas 2001.” Makoronaanto ti reyna iti maysa a rabii iti kombension no Abril 2001 idiay Sto. Nino Seaside, Tabucolan, Santa, Ilocos Sur.

Pagannurotan ti Salip:

1. Pumili ti kada tsapter iti isalipna a balasang nga:
    a. adda pamuyaanna
    b. masirib
    c. alerto ken saan a managbabain
    d. pangnamnamaan

2. Ipatulod ti tsapter ti ladawan ti kandidatana ken ababa a pakasaritaan ti biag ti kandidata iti:
“MUTIA TI GUMIL FILIPINAS 2001”
c/o BANNAWAG Magazine
Liwayway Publishing, Inc.
2249 Chino Roces Ave., 1231 Makati City, Philippines

3. Mayam-ammonto dagiti kandidata no Disiembre 2000 a pakaaramidanto metten ti umuna a “canvassing.”

4. Amin a tiket ken sobre a maiwaras, aggapu iti Tesorera ti GUMIL Filipinas nga addaan iti pirma ti Presidente ken Tesorera.

5. Sangapulo a butos ti kaibatogan ti tiket nga agpateg iti P10.00.

6.Maikkan ti tsapter nga addaan iti kandidata iti tiket nga agpateg iti P50,000.00 ken 200 a sobre. No agkurang, agpanayon ngem saan a maksayan.

7. Gapu iti panagaaddayotayo, mamindua laeng ti canvassing. Ti umuna, inton Disiembre ket ti maudi inton Abril.

8. Amin a sobre ken tiket a saan a nalako, masapul a maisubli sakbay ti maudi a canvassing.

9. No di maisubli, maibilangen a nalako. No ti naitinnag a butos ket nakurkurang ngem iti nayawat a tiket ken sobre, bayadan ti kandidata wenno tsapter dayta a kurang no dina naisubli sakbay ti maudi a canvassing. Sangapulo a pisos ti bayad ti maysa a sobre. Agbalin a pundo ti GF ti mabayadan kalpasan ti maudi a canvassing.

10. Amin a kandidata, maikkan/mapasublian iti 20 porsiento ti dagup a natinnagna kasta met a 10 porsiento ti maited iti chapter. Dagitoy ket sukat dagiti nagastosda a nagpastrek ken iti inggatangda iti kawesda a mapadayawan iti rabii ti koronasion sadiay Sto. Nino Seaside, Tabucolan, Santa, Ilocos Sur.

11. Maikkanto amin a naki-salip iti pammadayaw ken addadanto koma amin iti rabii ti koronasion.

Naisangsangayan daytoy a proyekto. Amin koma a kameng ti GUMIL, ipakatna koma ti amin a kabaelanna a tumulong ken makisinnaranay tapno mapatakder a dagus ti pasdek ti GUMIL Filipinas.

Naadaptar daytoy a pagannurotan iti miting ti GUMIL Filipinas idi Hulio 30, 2000 iti pagtaengan da Editor ken Mrs. Dionisio S. Bulong iti No. 14 Ayungin St., Cadaing Village, Talipapa, Quezon City, Philippines.

Pirmado:

MARTIN T. ROCHINA
Sekretario Heneral

JOSE A. BRAGADO
Presidente